ᒐᕙᒪᒃᑯᓐᓄᑦ ᐊᒃᑐᐃᓂᖃᓐᖏᖢᓂ ᒪᓕᒐᓕᐅᕐᕕᖕᒧᑦ ᑲᒪᔨᐅᖃᑕᐅᔪᖅ, ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓴᓇ ᓄᓇᕘᒧᑦ ᒪᓕᒐᓕᐅᖅᑎᓄᑦ ᖃᐅᔨᒪᔨᑕᕆᔭᐅᖃᑦᑕᖅᑐᖅ ᐊᒻᒪᓗ ᐅᖃᐅᔾᔪᐃᔨᒋᔭᐅᖃᑦᑕᖅᖢᓂ ᐃᖅᑲᓇᐃᔭᑦᑎᐊᕆᐊᖃᕐᓂᖅ ᐱᑦᑎᐊᕆᐊᖃᕐᓂᕐᓗ ᐱᔾᔪᑎᒋᓪᓗᒍ, ᐊᒻᒪᓗ ᑭᐅᑦᑕᖅᑎᒋᔭᐅᖃᑦᑕᖅᖢᓂ ᐃᓗᐃᑦᑑᑦᑎᐊᕆᐊᖃᕐᓂᕐᒧᑦ ᐱᖁᔭᕐᔪᐊᑦ ᐃᓗᐊᓃᑦᑐᑦ ᐊᑐᖅᖢᒋᑦ. ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇ ᐱᓕᕆᐊᒃᓴᖃᒃᑲᓐᓂᖅᑐᖅ ᐃᓗᐊᒍᑦ ᓄᓇᕗᑦ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᔪᐊᖓᒍᑦ ᐊᖏᖃᑎᒌᖃᖁᓪᓗᒍ ᒪᓕᒃᓯᒪᓂᖏᓐᓄᑦ, ᐃᖅᑲᖅᑐᖅᑕᐅᔾᔪᑎᒋᓐᖏᖔᕐᓗᓂ, ᑖᑦᓱᒧᖓ ᐃᓄᖕᒧᑦ ᓯᖁᒥᑦᑎᓯᒪᓂᕋᖅᑕᐅᔪᒧᑦ ᐱᖁᔭᕐᔪᐊᒧᑦ.

ᓄᓇᕗᑦ ᓴᖅᑭᑕᐅᓚᐅᕐᓂᖓᓂ ᐊᐃᕐᕆᓕ 1, 1999-ᒥ, ᐃᓗᐃᑦᑑᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐊᑐᓯᒋᐊᓚᐅᖅᓯᒪᔪᖅ ᔪᓚᐃ 1, 2001-ᒥ, ᐃᒻᒥᒧᓪᓗ ᐊᒡᕕᐊᕈᑎᖃᕐᓂᕐᒧᑦ ᒪᓕᒐᐃᑦ ᐊᑐᖅᑕᐅᓯᒋᐊᓚᐅᖅᓯᒪᓪᓗᑎᒃ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᒋᔭᐅᔪᓄᑦ, ᑕᒪᓐᓇᓗ ᒪᓕᒐᖅ ᒪᓕᒐᓕᐅᖅᑎᑦ ᐊᒻᒪᓗ ᓯᕗᓕᖅᑎᑦ ᑲᑎᒪᔨᖏᑦᑕ ᐱᖁᔭᕐᔪᐊᖓᑦᑕ 111-ᖓᓐᓃᓚᐅᖅᓯᒪᓪᓗᓂ, ᐊᔾᔨᑐᐃᓐᓇᕆᓪᓗᓂᔾᔪᒡᓗ ᓄᓇᑦᓯᐊᑉ ᒐᕙᒪᒃᑯᖏᑦᑕ ᐱᖁᔭᕐᔪᐊᖏᑦ.