|
ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᐅᑉ ᒥᒃᓵᓄᑦ ᐅᓂᒃᑳᑦ
 ᓄᐊᒪᓐ ᐱᑯᓪ ᓄᓇᕗᒻᒥ ᐃᓗᐃᑦᑑᑦᑎᐊᕐᓂᕐᒧᑦ ᑲᒥᓴᓇᐅᑲᐃᓐᓇᕐᓂᐅᑉ ᐃᓂᖓᓄᑦ ᑎᒃᑯᐊᖅᑕᐅᓚᐅᖅᓯᒪᔪᖅ ᔪᓚᐃ
3, 2008-ᖑᑎᓪᓗᒍ.
ᒥᔅᑐ ᐱᑯᓪ ᐊᒻᒪᓗ ᓄᓕᐊᖓ ᓈᓐᓯ, ᒐᑐᕆᑦᓯ ᐊᓐᓂᑎᐅᕆᔪᒥᐅᑖᒃ. ᐱᖓᓱᓂᒃ ᐃᓐᓇᐅᓕᖅᑐᓂᒃ ᕿᑐᕐᖓᖃᖅᑑᒃ
ᐊᒻᒪᓗ ᐊᑕᐅᓯᕐᒥᒃ ᐃᕐᖑᑕᖃᖅᖢᑎᒃ.
ᓄᐊᒪᓐ ᕗᐃᓐᓲ ᒪᓕᒐᕐᓂᐊᕐᓂᕐᒧᑦ ᐃᓕᓐᓂᐊᕐᕕᖓᓐᓂ ᐃᓕᓐᓂᐊᓚᐅᖅᓯᒪᔪᖅ ᐱᔭᕇᖅᓯᓪᓗᓂ, ᐊᒻᒪᓗ
ᒪᓕᒐᕐᓂᐊᖅᑎᓐᖑᖅᑎᑕᐅᓪᓚᕆᓚᐅᖅᓯᒪᓪᓗᓂ ᐊᓐᑎᐅᕆᔪᒥ 1974-ᖑᑎᓪᓗᒍ.
ᐊᕐᕌᒍᓄᑦ 30-ᓄᑦ ᒪᓕᒐᕐᓂᐊᖅᑎᐅᓪᓗᓂ, ᓄᐊᒪᓐ ᑭᓱᓕᒫᓂᒃ ᒪᓕᒐᕐᓂᐊᕐᓂᓕᕆᓂᕐᒧᑦ ᑐᕌᖓᔪᓂᒃ
ᑲᒪᖃᑦᑕᓚᐅᖅᓯᒪᔪᖅ, ᐃᓚᓕᐅᖢᒍ ᐃᖅᑲᖅᑐᐃᕕᒃᑎᒎᖅᑎᑦᑎᓂᕐᒥᒃ ᐊᖏᔪᓪᓚᕆᖕᒥᒃ ᐱᕋᔭᖕᓂᓕᕆᓂᕐᒨᖓᔪᖅ ᐊᒻᒪᓗ
ᐃᓚᔮᕇᑦ ᒪᓕᒐᖏᓐᓄᑦ ᑐᕌᖓᔪᓂᒃ. ᓄᐊᒪᓐ ᐱᓕᕆᐊᖃᓪᓗᐊᑕᖃᑦᑕᓕᖅᑐᖅ ᐃᒡᓗᓕᕆᓂᕐᒧᑦ ᑐᕌᖓᔪᓂᒃ,
ᐱᓯᓂᓯᓕᕆᓂᕐᒧᑦ ᐊᒻᒪᓗ ᑯᐊᐳᕇᓴᐃᑦ ᒪᓕᒐᖏᓐᓄᑦ ᑐᕌᖓᔪᓂᒃ, ᐃᓐᓇᓪᓚᕆᖕᓄᑦ ᒪᓕᒐᓂᒃ, ᐃᓅᔪᓐᓃᖅᑐᑦ
ᕿᒻᒪᑯᖏᓐᓂᒃ ᑲᒪᓂᐅᔪᒥᒃ ᐊᒻᒪᓗ ᐱᖁᑎᕐᔪᐊᓂᒃ ᕿᒻᒪᑯᓂᒃ ᐊᒻᒪᓗ ᐃᒡᓗᓕᕆᓂᕐᒧᑦ ᐸᕐᓇᐃᓂᕐᒥᒃ
(ᐃᓚᓕᐅᓪᓗᒍ ᐸᐸᑦᑎᔨᖃᕐᓂᕐᒧᑦ ᑐᕌᖓᔪᑦ ᐋᖅᑭᒃᓱᖅᑕᐅᖃᑦᑕᕐᓂᖏᑦ).
ᓄᐊᒪᓐ ᐱᑯᓪ ᐊᑯᓐᓂᖅᓱᖅᑎᒋᔭᐅᖃᑦᑕᕐᒥᔪᖅ, ᐃᓕᓐᓂᐊᖅᓯᒪᓪᓗᓂ ᐱᓕᒻᒪᒃᓯᒪᓂᑰᓪᓚᕆᒃᖢᓂᓗ ᐊᔾᔨᒌᓐᖏᑦᑐᓂᒃ
ᐊᖏᖃᑎᒌᒍᓐᓇᐃᓪᓕᔪᓄᑦ ᐊᑯᓐᓂᖅᓱᖅᑎᒋᔭᐅᓂᖅ. ᒪᓕᒐᕐᓂᐊᖅᑎᐅᓐᖏᖔᕐᓗᓂ ᖁᕕᐊᒋᓂᖅᓴᖓ, ᓲᕐᓗ
ᐊᑯᓐᓂᖅᓱᖅᑎᒋᔭᐅᓪᓗᓂ ᐃᓚᔮᕇᖕᓄᑦ ᒪᓕᒐᖅᑎᒍᑦ ᐊᖏᖃᑎᒌᒍᓐᓇᐃᓪᓕᔪᓂᒃ ᐊᒻᒪᓗ ᐊᓯᖏᓐᓂᒃ ᒪᓕᒐᖅᑎᒍᑦ
ᐊᖏᖃᑎᒌᒍᓐᓇᐃᓪᓕᐅᑕᐅᔪᓂᒃ. ᓄᐊᒪᓐ ᐊᓐᑎᐅᕆᔪᒥ ᓱᕈᓰᑦ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ
ᐊᑯᓐᓂᖅᓱᖅᑎᒋᔭᐅᓂᕐᒧᑦ ᑕᐃᔭᐅᖃᑕᐅᓯᒪᔪᖅ.
ᐃᓕᓐᓂᐊᖅᓯᒪᓪᓗᓂ ᐱᓕᒻᒪᒃᓯᒪᓪᓗᓂᓗ ᐊᖏᖃᑎᒌᒍᓐᓇᐃᓪᓕᔪᓄᑦ ᐃᖅᑲᖅᑐᐃᔨᐅᓂᕐᒥᒃ, ᒥᔅᑐ ᐱᑯᓪ
ᐊᔾᔨᒌᓐᖏᕈᓘᔭᖅᑐᓂᒃ ᐊᖏᖃᑎᒌᒍᓐᓇᐃᓪᓕᐅᑕᐅᔪᓂᒃ ᑲᒪᔪᓐᓇᕐᒥᔪᖅ.
ᐊᕐᕌᒍᓄᑦ 21-ᓄᑦ, ᓄᐊᒪᓐ ᐃᖅᑲᖅᑐᐃᔨᐅᖃᑦᑕᖅᓯᒪᔪᖅ ᐃᖅᑲᖅᑐᐃᕕᒃᑎᒎᕈᑕᐅᔭᕆᐊᓕᖕᓂᒃ
ᐊᖏᖃᑎᒌᒍᓐᓇᐃᓪᓕᐅᑕᐅᔪᓂᒡᓗ ᐊᖏᓗᐊᓐᖏᑦᑐᓕᕆᔪᓄᑦ ᐃᖅᑲᖅᑐᐃᔨᐅᓪᓗᓂ.
ᑕᐃᒪᓐᖓᓂᑦ 1989-ᒥᓂᑦ, ᓄᐊᒪᓐ ᐱᑯᓪ ᐊᓐᑎᐅᕆᔪᒥ ᒪᓕᒐᕐᓂᐊᖅᑏᑦ ᑲᑐᔾᔨᖃᑎᒌᖏᓐᓄᑦ ᒪᓕᒐᕐᓂᐊᖅᑏᑦ
ᐱᐅᓯᖏᓐᓂᒃ ᕿᒥᕐᕈᔨᐅᓯᒪᓕᖅᑐᖅ.
ᓄᐊᒪᓐ ᓄᓇᓕᖁᑎᒥᓂ ᖃᓄᐃᓕᐅᕈᓘᔭᐃᓐᓇᖅᑐᖅ. ᑕᐃᒪᓐᖓᓂᑦ ᒑᑐᕆᑦᓯ, ᐊᓐᑎᐅᕆᔪᒧᑦ ᓅᓚᐅᖅᓯᒪᒐᒥ
1972-ᒥᓂᑦ, ᑐᒃᓯᕋᕐᕕᓕᕆᕈᓘᔭᖅᑐᖅ, ᐊᑭᓕᖅᓱᖅᑕᐅᓐᖏᑦᑐᓂᓗ ᑲᑐᔾᔨᖃᑎᒌᓃᖃᑕᐅᓪᓗᓂ, ᐋᓐᓂᐊᕕᖓᓐᓂ
ᐃᖅᑲᓇᐃᔭᖃᑦᑕᖅᖢᓂ, ᐃᓕᓐᓂᐊᕐᓂᓕᕆᔨᒃᑯᓪᓗ ᑲᑎᒪᔨᖏᓐᓃᖃᑦᑕᖅᓯᒪᓪᓗᓂ ᐊᒻᒪᓗ ᐊᓯᖏᓐᓂ.
ᓄᐊᒪᓐ ᐃᒃᓯᕙᐅᑕᕆᔭᐅᔪᖅ ᐊᓕᒃᓵᓐᑐᕋᐅᑉ ᐋᓐᓂᐊᕕᖏᓐᓂ ᒪᕐᕉᖕᓂ ᑲᑎᒪᔨᐅᓂ, ᑕᐃᑲᓃᖢᑎᒃ ᒑᑐᕆᑦᓯ
ᐊᓐᑎᐅᕆᔪᒥᑦ ᔫᓂ 2004-ᒥᓂᑦ ᔫᓂ 2007-ᒧᑦ, ᐊᒻᒪᓗ ᓱᓕ ᒫᓐᓇᒧᑦ ᑎᑭᖢᒍ ᑲᑎᒪᔨᐅᖃᑕᐅᔪᖅ.
ᓄᐊᒪᓐ ᐃᓚᒋᔭᐅᖃᑕᐅᔪᖅ ᐊᖓᔪᖅᑳᖑᖃᑦᑕᖅᓯᒪᓪᓗᓂᓗ ᕉᑐᕆᒃᑯᑦ ᐊᑭᓕᖅᓱᖅᑕᐅᓐᖏᑦᑐᑦ ᑲᑐᔾᔨᖃᑎᒌᖏᓐᓄᑦ
ᒑᑐᕆᑦᓯᒥ (1979-ᒥᑦ 1980-ᒧᑦ) ᐊᒻᒪᓗ ᐃᓚᒋᔭᐅᖃᑕᐅᓪᓗᓂ ᐊᖓᔪᖅᑳᖑᓯᒪᓪᓗᓂᓗ ᕼᐃᐅᕌᓐ
ᒪᓕᒐᕐᓂᐊᖅᑏᑦ ᑲᑐᔾᔨᖃᑎᒌᖏᓐᓄᑦ (1996-ᒥᑦ 1998-ᒧᑦ).
ᐃᓚᒋᔭᐅᖃᑕᐅᖕᒥᔪᖅ ᔪᓇᐃᑎᑦ ᑐᒃᓯᐊᕐᕕᖓᓄᑦ ᒑᑐᕆᑦᓯ ᐊᓐᑎᐅᕆᔪᒥᑦ ᑕᐃᒪᓐᖓᓂᑦ 1972-ᒥᓂᑦ, ᐊᒻᒪᓗ
ᑐᒃᓯᐊᕐᕖᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᐅᓯᒪᓪᓗᓂ ᑲᑎᖢᒍ ᐊᕐᕌᒍᓄᑦ ᑎᓴᒪᓄᑦ - 1975-ᒥᑦ ᐊᒻᒪᓗ
1976-ᒥᑦ, ᐃᓕᒃᑲᓐᓂᓚᐅᖅᖢᓂᓗ 1999-ᒥᑦ 2000-ᒥᓗ.
ᐊᕐᕌᒍᓄᑦ 9-ᓄᑦ (1988-ᒥᑦ 1997-ᒧᑦ), ᓄᐊᒪᓐ ᕼᐃᐅᕌᓐ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᖏᓐᓄᑦ
ᐃᓚᒋᔭᐅᖃᑕᐅᓯᒪᔪᖅ (ᒫᓐᓇ ᑖᓐᓇ ᐃᓚᒋᔭᐅᖃᑕᐅᓕᖅᑐᖅ ᐊᐃᕚᓐ ᒪᐃᑦᓚᓐ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᓄᑦ). |
