|
ᓱᓕᑦᑎᐊᕐᓂᕐᒧᑦ ᐅᒃᐱᕆᔭᐅᔪᓐᓇᕐᓂᕐᒧᓪᓗ ᐱᖁᔭᕐᔪᐊᖅ ᖃᓄᐃᑦᑑᖕᒪᖔᖓ
ᓱᓕᑦᑎᐊᕐᓂᕐᒧᑦ ᐅᒃᐱᕆᔭᐅᔪᓐᓇᕐᓂᕐᒧᓪᓗ ᐱᖁᔭᕐᔪᐊᖅ ᒪᓕᒐᖅᑎᒍᑦ
ᐋᖅᑭᒃᓯᓯᒪᔾᔪᑕᐅᕗᖅ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑏᑦ ᐊᖏᖅᓯᒪᑦᑎᐊᕐᓂᖏᓐᓂᒃ ᐃᒻᒥᒧᑦ ᑐᕌᖓᔪᓂᒃ ᓴᓂᕐᕙᐃᓯᒪᓂᐊᕐᓂᖏᓐᓂᒃ
ᐃᓘᓐᓇᖏᓐᓄᑦ ᐱᐅᓂᖅᓴᐅᓂᐊᖅᑐᑦ ᓯᕗᓪᓕᐅᔾᔨᓯᒪᖔᕐᓂᐊᖅᓯᒪᓗᑎᒃ. ᐋᖅᑭᒃᓱᐃᓯᒪᕗᑦ ᒪᓕᒐᕐᓂᒃ ᐊᒻᒪᓗ
ᐅᓂᒃᑳᖅᑕᖃᑦᑕᕆᐊᖃᕐᓂᐊᕐᓂᖏᓐᓂᒃ ᐃᖅᑲᓇᐃᔭᑦᑎᐊᕈᓯᐅᓂᐊᖅᑐᑦ ᐱᔾᔪᑎᒋᓪᓗᒋᑦ.
ᐱᖁᔭᕐᔪᐊᑦ ᐃᓗᓕᖏᓐᓃᑦᑐᑦ ᐃᓚᖏᑦ ᑖᒃᑯᑎᒎᓇᖅ ᐅᓂᒃᑲᐅᓯᕆᔭᐅᓯᒪᔪᑦ, ᑭᓯᐊᓂᓗ
ᑕᐃᒪᐃᑦᑑᒐᓗᐊᖅᑎᓪᓗᒍ, ᐃᓗᐃᒃᑲᓂᒃ ᒪᓕᒐᓪᓚᑦᑖᓂᒡᓗ ᑕᑯᒋᐊᓪᓗᐊᖅᑐᑎᑦ ᑐᑭᓯᓪᓚᕆᒍᒪᒍᕕᒋᑦ ᐃᓗᓕᖏᑦ.
ᒪᓕᒐᓕᐅᖅᑎᓕᒫᑦ ᐊᖏᖅᓯᒪᕗᑦ ᐃᒪᐃᓕᐅᕐᓂᐊᕐᓂᕋᖅᓯᒪᓂᕐᒧᑦ:
- ᒪᓕᒐᓕᐅᖅᑎᐅᓂᕐᒥᓄᑦ ᐃᖅᑲᓇᐃᔮᖃᓕᕐᓂᖓᓄᑦ ᐱᓕᕆᐊᒃᓴᕆᔭᒥᓂᒃ
ᐱᓕᕆᐊᖃᑦᑎᐊᕐᓗᓂ ᐋᖅᑭᐅᒪᑎᑦᑎᓂᐊᕐᓗᓂᓗ ᐊᕕᒃᓯᒪᑎᑦᑎᔪᓐᓇᕐᓗᓂ ᐃᒻᒥᒃᑯᑦ ᑲᒪᒋᒋᐊᖃᖅᐸᒃᑕᒥᓂᒃ ᑕᖅᑲᑯᓄᖓ
ᐅᒃᐱᕆᔭᐅᑦᑎᐊᕈᓐᓇᐃᓐᓇᕐᓂᐊᕐᒪᑦ ᓱᓕᑦᑎᐊᕈᓐᓇᕐᓂᖓᓄᑦ, ᓱᓕᔪᒥᒃ ᑐᓐᖓᓂᖃᕐᓗᓂ, ᐃᒻᒥᒃᑯᓪᓗ ᐊᒃᑐᐊᓂᖃᖅᑎᑦᑎᓐᖏᓪᓗᓂ
ᐋᖅᑭᐅᒪᑎᑦᑎᔪᓐᓇᕐᓗᓂ ᑲᒪᒋᔭᐅᒋᐊᖃᖅᐸᒃᑯᓂᒃ ᒪᓕᒐᓕᐅᖅᑎᐅᓂᕐᒧᑦ.
- ᐃᒻᒥᓄᑦ ᐊᑭᓕᐅᑕᐅᓇᓱᒃᑐᓂᒃ, ᑐᓐᓂᖅᑯᓯᐊᓂᒡᓗ
ᐃᑲᔫᓯᐊᖑᓇᓱᒃᑐᓂᒡᓘᓐᓃᑦ ᐊᖏᕈᑎᖃᖅᐸᓐᖏᓪᓗᓂ, ᑕᐃᒪᐃᑦᑐᓂᒃ ᐊᖏᕈᑎᖃᕈᓂ ᓈᒻᒪᒋᔭᐅᔪᓐᓃᑐᐃᓐᓇᕆᐊᖃᕐᒪᑦ ᑕᖅᑳᓐᖓᑦ
ᐅᒃᐱᕆᔭᐅᔪᓐᓃᕐᕈᑎᒋᑐᐃᓐᓇᕆᐊᖃᕐᒪᒍ ᓱᓕᑦᑎᐊᕈᓐᓇᕐᓂᖓᓄᑦ, ᓱᓕᔪᒥᒃ ᑐᓐᖓᓂᖃᑦᑎᐊᕈᓐᓇᕐᓂᕐᒧᑦ ᐊᒻᒪᓗ ᐃᒻᒥᒃᑯᑦ
ᐊᒃᑐᐊᓂᖃᖅᑎᑦᑎᓐᖏᓪᓗᓂ ᐋᖅᑭᐅᒪᑎᑦᑎᔪᓐᓇᕐᓂᕐᒧᑦ ᒪᓕᒐᓕᐅᖅᑎᐅᓂᕐᒧᑦ ᐊᒻᒪᓗ ᐊᓯᖏᓐᓂᒃ ᖃᓄᐃᓕᐅᕈᑎᒋᕙᒃᑕᖏᓐᓂᒃ
ᑕᖅᑲᒃᑯᓄᖓ ᓇᐅᑦᑎᖅᓱᖅᑕᐅᓕᕈᑎᒋᓇᔭᖅᑕᖏᓐᓂᒃ ᖃᓄᖅ ᐱᓕᕆᐊᒃᓴᒥᓂᒃ ᐱᓕᕆᑦᑎᐊᕋᓱᒋᔭᐅᔪᓐᓃᕈᓂ.
- ᐋᖅᑭᐅᒪᑎᑦᑎᓗᓂ ᐊᕕᒃᓯᒪᑎᑦᑎᔪᓐᓇᕐᓂᕐᒧᑦ ᐃᒻᒥᒃᑯᑦ
ᑲᒪᒋᒋᐊᖃᖅᐸᒃᑕᒥᓂᒃ ᒪᓕᒍᑎᖃᑦᑎᐊᖅᑐᓂᒃ ᐋᖅᑭᒃᓯᒪᔾᔪᑎᓂᒃ ᒪᓕᒐᒃᓴᐅᑎᑕᐅᔪᓂᒃ ᑕᕝᕙᓂ ᐱᖁᔭᕐᒥᑦ ᐊᒻᒪᓗ
ᖃᓄᐃᓕᐅᕈᑎᖃᖅᑎᑦᑎᓇᓱᒃᐸᒡᓗᓂ ᐱᑕᖃᓕᖅᑎᑦᑎᑦᑕᐃᓕᒪᑎᑦᑎᓂᕐᒧᑦ ᑕᒪᒃᑯᓂᖓ ᐱᓕᕆᐊᒥᒃ ᐊᑐᕐᓂᕐᓘᑕᐅᔪᑦ ᐃᒻᒥᒃᑯᑦ
ᐱᕙᓪᓕᐊᔾᔪᑎᒋᔭᐅᓇᓱᐊᖅᑕᐅᓪᓗᑎᒃ.
- ᐱᔾᔪᑎᖃᑦᑎᐊᖅᑐᓂᒃ ᐊᒃᓱᕉᑎᖃᑦᑎᐊᖅᐸᒡ ᐊᑐᖅᓯᓗᑎᒃ ᑕᖅᑲᒃᑯᐊ
ᐱᔪᒪᔭᖓᓐᓂᒃ ᐋᖅᑭᒃᓯᓇᓱᒃᐸᒡᓗᑎᒃ ᓈᒻᒪᓐᖏᓕᐅᕈᑕᐅᔪᓂᒃ ᑕᒪᒃᑯᓂᖓ ᓴᖅᑭᑐᐃᓐᓇᕆᐊᖃᖅᑐᓂᒃ ᖃᓄᑐᐃᓐᓇᖅ ᐱᓕᕆᐊᒥᒃ
ᐊᑐᕐᓂᕐᓘᑕᐅᔪᕕᓂᕐᓂᒃ ᐃᒻᒥᒃᑯᑦ ᐱᕙᓪᓕᐊᔾᔪᑎᒋᔭᐅᓇᓱᐊᖅᑎᓪᓗᒋᑦ.
ᑕᖅᑲᐅᖓ ᒪᑐᐃᖓᑦᑎᐊᕆᐊᖃᕐᓂᖅ ᓇᐅᑦᑎᖅᓱᖅᑕᐅᓂᕐᓗ ᐱᔾᔪᑎᒋᓪᓗᒍ
ᒪᓕᒐᓕᐅᖅᑏᑦ ᐊᑐᓂ ᐊᕐᕌᒍᑕᒫᖅ ᓇᓗᓇᐃᓐᖑᐃᖃᑦᑕᕆᐊᖃᖅᑐᑦ ᓇᑭᓐᖔᓚᐅᕐᒪᖔᖏᑦ ᖃᓄᐃᑦᑐᓂᒡᓗ ᖃᑕᓐᖑᑎᒌᑦ
ᑮᓇᐅᔭᖅᑖᖃᑦᑕᕐᒪᖔᖏᑦ, ᐱᖁᑎᖏᓪᓗ, ᐊᑭᓕᒃᓴᓐᖑᑐᐃᓐᓇᕆᐊᓖᓪᓗ, ᐱᓯᓂᓯᖃᖃᑕᐅᕝᕕᒋᔭᖏᑦ ᐊᒻᒪᓗ ᒐᕙᒪᒃᑯᓐᓂᑦ
ᑳᓐᑐᑎᕌᒃᑖᕆᓯᒪᔭᖏᑦ ᖃᓄᐃᑦᑑᖕᒪᖔᖏᑦ. ᒪᓕᒐᓕᐅᖅᑎ
ᐅᕝᕙᓘᓐᓃᑦ ᖃᑕᓐᖑᑎᖏᑦ ᖃᓄᐃᑦᑐᑐᐃᓐᓇᕐᓂᒃ ᑐᓐᓂᖅᑯᓯᐊᖅᑖᕐᓂᖅᐸᑕ ᐃᑲᔫᓯᐊᖅᑖᕐᓂᖅᐸᑕᓘᓐᓃᑦ $400 ᐅᖓᑖᓂ ᐊᑭᓕᖕᓂᒃ,
ᐃᒻᒥᒧᑦ ᐃᓘᓐᓇᖏᓐᓄᓪᓘᓐᓃᑦ ᑲᑎᓪᓗᒋᓪᓘᓐᓃᑦ 12 ᑕᖅᑭᑦ ᐃᓗᐊᓂ, ᑕᖅᑲᐅᖓ ᐊᑐᐃᓐᓇᕈᖅᑎᑕᐅᖃᓯᐅᔾᔭᐅᓯᒪᔭᕆᐊᖃᕐᒥᔪᑦ.
ᒪᓕᒐᓕᐅᖅᑏᑦ ᐅᓂᒃᑲᐅᓯᕆᑦᑎᐊᖅᓯᒪᔭᖏᑦ ᑕᖅᑲᐅᖓ ᐊᑐᐃᓐᓇᕈᖅᑎᑕᒃᓴᑦ
ᐊᑐᐃᓐᓇᐅᔪᑦ ᒪᓕᒐᓕᐅᕐᕕᐅᑉ ᑎᑎᕋᖅᑎᖓᓐᓂ (ᓱᒃᑲᔪᒃᑯᑦ: 867.975.5191) (http://www.assembly.nu.ca/English/members/index.html)
ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒧᑦ ᑐᑭᖏᑦ ᓇᓗᓇᐃᖅᓯᒪᑦᑎᐊᖅᑐᑦ ᐃᒪᓐᓇ:
"ᒪᓕᒐᓕᐅᖅᑎ ᐃᓱᒪᓕᐅᕆᐊᖃᓐᖏᓚᖅ ᐅᕝᕙᓘᓐᓃᑦ
ᐃᓱᒪᓕᐅᖃᑕᐅᓇᓱᒋᐊᖃᓐᖏᓚᖅ ᐱᔾᔪᑎᖃᕐᓂᐊᖅᑎᓪᓗᒋᑦ ᐱᓕᕆᔾᔪᑎᒋᖃᑦᑕᕐᓂᐊᖅᑕᖏᓐᓂᒃ ᒪᓕᒐᓕᐅᖅᑎᐅᓂᕐᒥᓄᑦ
ᐱᓕᕆᐊᒃᓴᖅᑖᕆᓯᒪᔭᖏᓐᓂᒃ ᐅᕝᕙᓘᓐᓃᑦ ᐊᑐᕈᑎᒋᖃᑦᑕᕐᓂᐊᖅᑕᖏᓐᓂᒃ ᐊᖓᔪᖅᑳᖑᓂᕐᒧᑦ ᓴᓐᖏᓂᖅᑖᕆᑎᑕᐅᓯᒪᔪᓂᒃ ᐅᕝᕙᓘᓐᓃᑦ
ᐱᓕᕆᐊᕆᖃᑦᑕᕐᓂᐊᖅᑕᖏᓐᓂᒃ ᐊᖓᔪᖅᑳᖑᓂᕐᒧᑦ ᐱᓕᕆᐊᒃᓴᖅᑖᕆᑎᑕᐅᓯᒪᔪᓂᒃ ᒪᓕᒐᓕᐅᖅᑎᐅᓂᕐᒥᓄᑦ ᐱᓕᕆᔾᔪᑎᒋᒋᐊᖃᖅᑕᖏᓐᓂᒃ
ᑖᓐᓇ ᒪᓕᒐᓕᐅᖅᑎᐅᔪᖅ ᖃᐅᔨᒪᒍᓂ ᐅᕝᕙᓘᓐᓃᑦ ᖃᐅᔨᒪᑐᐃᓐᓇᕆᐊᖃᕈᓂ ᑕᒪᒃᑯᓂᖓ ᐱᓕᕆᔾᔪᑎᖃᕈᓂ ᐱᓕᕆᐊᒃᓴᓂᒃ ᑖᔅᓱᒪ
ᒪᓕᒐᓕᐅᖅᑎᐅᑉ ᐃᒻᒥᒃᑯᑦ ᐊᑲᐅᓈᕈᑎᖃᒃᑲᓐᓂᕋᓱᓕᕋᔭᕐᒪᑦ ᐅᕝᕙᓘᓐᓃᑦ ᐊᑐᕐᓂᕐᓘᑎᖃᕐᓗᓂ ᐊᓯᒥᓂᒃ ᐃᓄᖕᒥᒃ ᐃᒻᒥᒃᑯᑦ
ᐊᑲᐅᓈᕈᑎᖃᖅᑎᑦᑎᓇᓱᒃᑲᓐᓂᕐᓗᓂ."
ᒪᓕᒐᓕᐅᖅᑎ ᐅᒃᐱᕆᔭᒃᓴᐅᑎᖃᕈᓂ ᐃᒻᒥᒧᑦ ᐊᒡᕕᐊᕈᑎᖃᕐᓂᐊᕋᓱᒋᒍᓂ
ᖃᓄᐃᑦᑐᑐᐃᓐᓇᕐᒥᒃ ᑲᑎᒪᔾᔪᑕᐅᓂᐊᖅᑐᓂᒃ ᓇᓗᓇᐃᖅᓯᑲᐅᑎᒋᒋᐊᓕᒃ ᐊᒻᒪᓗ ᒪᓕᒐᓕᐅᕐᕕᖕᒧᑦ ᑲᑎᒪᓂᐅᔪᒥ, ᒥᓂᔅᑕᐃᑦ
ᑲᑎᒪᓂᖏᓐᓂ ᐅᕝᕙᓘᓐᓃᑦ ᑲᑎᒪᔨᕋᓛᑦ ᑲᑎᒪᓂᖓᓐᓂ ᐊᓂᓗᓂ ᑕᒪᓐᓇ ᑲᑎᒪᔾᔪᑕᐅᓂᐊᖅᑐᖅ ᐃᓚᐅᕝᕕᒋᓐᖏᓪᓗᓂᐅᒃ ᐅᕝᕙᓘᓐᓃᑦ
ᓂᕈᐊᖃᑕᐅᓐᖏᓪᓗᓂ ᑕᒪᓐᓇ ᐱᔾᔪᑕᐅᑎᓪᓗᒍ.
ᒪᓕᒐᓕᐅᖅᑎ ᒐᕙᒪᒃᑯᓐᓂᒃ ᑳᓐᑐᕌᖃᑎᖃᓂᕈᓐᓇᖅᑐᖅ ᐱᔪᓐᓇᖅᑎᑕᐅᒍᓂ ᑭᓯᐊᓂ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓴᓇᒧᑦ
ᐅᕝᕙᓘᓐᓃᑦ ᐱᓯᓂᓯᖃᕐᓂᕐᒧᑦ ᐊᐅᓚᑕᖓ ᐊᓯᐊᓄᑦ ᐊᖏᖅᑕᐅᓯᒪᔪᒧᑦ ᑎᒍᒥᐊᖅᑕᐅᒃᐸᑦ ᐸᐸᑦᑎᔨᖓᓄᑦ.
ᒥᓂᔅᑕᐃᑦ ᓯᓚᑖᓃᑦᑐᓂᒃ ᖃᓄᖅ ᐱᓕᕆᔪᓐᓇᖅᑎᑕᐅᓂᖏᑦ ᐊᒻᒪᓗ
ᕿᑐᕐᖏᐅᖅᑐᒃᓴᓕᐅᕐᓂᐊᖅᑕᖏᑦ ᑭᒡᓕᓕᐅᖅᑕᐅᓯᓪᓗᑎᒃ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒧᑦ ᐅᕝᕙᓘᓐᓃᑦ
ᖃᓄᐃᓕᐅᕐᓂᐊᕐᒪᖔᖏᑦ ᐊᖏᖅᑕᐅᓯᒪᔪᓄᑦ ᐸᐸᑦᑎᔨᓄᑦ ᑎᒍᒥᐊᖅᑕᐅᔪᑦ. ᒪᓕᒐᖃᐅᖅᑎᑕᐅᒃᑲᓐᓂᑐᐃᓐᓇᕆᐊᖃᖅᑐᑦ
ᓯᕗᓕᖅᑎᒧᑦ ᖃᓄᐃᓕᖓᕈᓐᓇᖅᑕᖏᑦ. ᒥᓂᔅᑕᕕᓂᖅ
ᓄᖅᑲᖓᐅᑎᓕᐅᕈᔾᔭᐅᓯᒪᖃᑦᑕᕐᓂᐊᖅᐳᖅ 6-ᓄᑦ ᑕᖅᑭᓄᑦ, ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒧᑦ ᐱᔪᓐᓇᖅᑎᑕᐅᓂᖓᑕ
ᒪᓕᒐᖏᑦ ᒪᓕᒡᓗᒋᑦ, ᑳᓐᑐᕌᒃᑖᕈᓐᓇᓐᖏᑎᑕᐅᓗᓂ ᒐᕙᒪᒃᑯᓐᓂᑦ, ᐊᔭᐅᕆᒋᐊᖃᓐᖏᓗᓂ, ᑳᓐᑐᕌᖕᓂᒡᓗ ᐃᑲᔫᑎᒃᓴᓂᒡᓘᓐᓃᑦ
ᐱᔪᓐᓇᖅᑎᑕᐅᓐᖏᓪᓗᓂ ᑭᓇᑐᐃᓐᓇᕐᒥᑦ ᑳᓐᑐᕌᒃᑖᖅᑎᑕᕕᓂᕐᒥᒃ ᒥᓂᔅᑕᐅᑉ ᐱᓕᕆᕕᖓᓐᓂ.
ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇ ᐅᖃᐅᔾᔪᐃᔪᓐᓇᖅᑐᖅ
ᒥᓂᔅᑕᓂᒃ, ᐊᒻᒪᓗ ᐅᖃᐅᔾᔫᑎᖏᑦ ᑎᑎᖅᑲᑎᒎᖓᑎᑉᐸᖏᑦ ᓴᐳᒻᒥᐅᑎᒋᓕᑐᐃᓐᓇᕆᐊᖃᖅᖢᓂᒋᑦ ᖃᓄᖅ ᓱᒋᐊᖅᑕᐅᓐᓂᖅᐸᑦ ᖃᖓᑐᐃᓐᓇᖅ.
ᑭᓇᑐᐃᓐᓇᖅ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᑎᑦᑎᓂᕐᒧᑦ ᑲᒥᓴᓇᒥᒃ
ᑎᓕᓯᔪᓐᓇᖅᑐᖅ ᒪᓕᒐᓕᐅᖅᑎ ᖃᐅᔨᒋᐊᖅᑕᐅᖁᓗᒍ ᒪᓕᒐᓂᒃ ᒪᓕᑦᑎᐊᓕᕋᓗᐊᕐᒪ.ᖔᖓ, ᐊᒻᒪᓗ ᖃᐅᔨᔭᓂ ᒪᓕᒐᓕᐅᕐᕕᖕᒧᑦ
ᐅᓂᒃᑲᐅᓯᕆᔭᕆᐊᖃᖅᖢᓂᒋᑦ ᖃᓄᐃᑦᑐᑐᐃᓐᓇᕐᓂᒃ ᐊᑐᓕᖁᔭᓕᐅᕐᓗᓂ ᖃᓄᐃᓕᒋᐊᕈᑕᐅᔾᔪᑎᒃᓴᓂᒃ, ᑖᒃᑯᐊᓗ ᒪᓕᒐᓕᐅᖅᑎᓄᑦ
ᐊᖏᖅᑕᐅᔪᓐᓇᖅᖢᑎᒃ ᐊᖏᖅᑕᐅᓐᖏᑦᑐᓐᓇᖅᖢᑎᒡᓗ. |
